Bizitzea egokitu zaigun egoera berezi hau dela eta, gerta daiteke nekea bezalako sentsazioak izatea. Konektatuta eta bihozbera mantentzeak nekea gainditzen lagundu diezaguke, Nature-n argitaratutako Desiree Dickerson psikologo klinikoaren azken argitalpenaren arabera. Nature egungo aldizkari zientifiko prestigiotsuenetarikoa da.

Osasun mentalean eta ongizate akademikoan aditua den Dickersonek artikuluan dioenez, gero eta gogorragoa egiten ari zaio koarentenan daramagun egun bakoitza, etxean bi ume txikirekin lanean jarraitzen saiatzen baita. Burua birusaren hedatzearekin lotutako kezkaz beterik dugu, bai eta horrek gure osasunean eta gure familiaren eta kuttunen ongizatean duen eraginaz ere. Egoera honetan, nola mantentzen dugu gure eta gure adiskide eta familien osasun mentala? Hona hemen Desiree Dickersonek beste aditu eta ikasle batzuekin izandako elkarrizketen ondorio gisa eskaintzen dituen gomendioak.

  1. Nork bere espektatibak kudeatzea.

Ziurrenik, etapa hau ez da amestutako idazleen erretiroa. Koarentena-garaian produktibitateak gora egin behar duelako ideia geure buruarekin gero eta zorrotzagoak izatera eraman gaitzake. Horren aurrean, gomendioa da pandemiak dakarren karga emozionala eta kognitiboa ez gutxiestea, izan ere animo baxuak, kontzentratzeko zailtasuna eta arreta gutxitzea eragin dezakeelako. Beraz, errealistak izatea gomendatzen da geure buruari planteatzen dizkiogun eguneroko erronkekin.

  1. Estresa eraginkorki kudeatu.

Horretarako, loa zaintzea garrantzitsua da. Lokartzerakoan argi urdinak ekiditea gomendatzen da, bai eta lo-ordu kopuru egonkorra mantentzea ere. Elikadura orekatua izatea komenigarria da, nahiz eta estres handiko garaietan batzuen joera alkohola edo osasuntsuak ez diren janak hartzea den. Kirola egitea ere garrantzitsua da, emozioak kudeatzeko eta loaren kalitatea hobetzeko lagungarria baita.

  1. Bandera gorriak: nork bere mugak ezagutzea.

Estres handiko uneetan, egoera zail horietan estutasuna sortzen diguten pentsamenduak edo sentsazio fisikoak identifika ditzakegu. “Zergatik ezin naiz kontzentratu?” bezalako galderen aurrean, frustrazioa, kezka, tristura bezalako sentimenduak tentsio, ezinegon, tripako min edo urduritasuna bezalako sentsazio fisikoen / izan daitezke. Ziklo horren alderdi bati irtenbidea topatzea nahikoa izan daiteke ezinegonen multzo osoa aldatzeko. Adibidez, sentsazio fisikoak pairatzen ditugunean, arnasketa sakon eta lasaiarekin –lautan airea hartu eta beste lautan bota- egoeraren kontrola berreskuratu dezakegu.

  1. Errutinak.

Umeekin funtzionatzen duen gako hau antsietatea kontrolatzeko lagungarria gerta dakiguke helduoi, bai eta errealitate aldakor honetara egokitzeko ere. Lanean ari garen denbora eta lanetik kanpokoa argi bereiztea komenigarria da, bai espazio fisikoari dagokionez, bai eta geure buruan ere. Lana eta atsedenaldiak tartekatzea, eta etenaldi horietan atseginak gertatzen zaizkigun gauzak egiteko aprobetxatzea (birusarekin erlazionatuak ez daudenak) ere komenigarria da.

  1. Bihozbera izan zeure buruarekin eta besteekin.

Kontrolatu ezin ditugun gauza asko daude, baina geure buruari eta besteei hitz egiteko erabiltzen ditugun hitzak eta tonua gure esku daude, eta horiek bai, egoera honi aurre egiteko tresna eraginkorrak dira.

  1. Konexioak mantendu.

Barnerakoiak diren pertsonek ere konektatuta sentitu behar dute euren osasun mental eta fisikoari eusteko. Lantalde askok lanerako foru birtualak sortu dituzte, bai laneko kontuak eztabaidatzeko eta baita solasean aritzeko ere. Kafe birtualak, liburu-solasaldiak, edo beste batzuekin –birtualki- lan egitea konektatuta mantentzeko modu batzuk dira. Isolamendu sozialean gauden arren, horrek ez du zertan esan nahi bakarrik sentitu behar garenik.

  1. Ezjakintasuna kudeatu “orainaldian” mantenduz.

Egunean zehar orainaldian pentsatzea arreta mantentzeko lagungarria izan daiteke. Horretarako, meditazio- eta erlaxazio-teknikak probatzeko une egokia izan daiteke.

Gure osasun mentala eta ongizatea babesteko neurriak hartzeak, geure burua babesteaz gain, ingurukoen ongizatea zaintzen ere lagundu diezaguke.

Egilea: Kaiera

Kaiera Logo (K)