Genero-indarkeria pairatzeak eta horren aurka borrokatzeak errepresalia larriak eragin diezazkieke biktimei eta horien alde jartzen diren pertsonei. Emakume batzuek bezala, hainbat gizonek ere -Maskulinitate Alternatibo Berriak izenekoek (MAB)- genero-indarkeriaren aurka borrokatzen lagundu dute hainbat testuingurutan, eta indarkeria edo ondorio kaltegarri horiek jaso izan dituzte, Genero Indarkeria Isolatzailea, hain zuzen ere.
Nazareno eta kideek egindako ikerketan (Men Tackling Isolating Gender Violence to Fight against Sexual Harassment) egoera horretan sakondu dute, eta bereziki aztertu dute MAB gizonek, jazarpenaren aurka egoteaz gain, biktimei aktiboki laguntzen ere nola parte hartzen duten, eta zer ondorio eta babes izan dituzten. Horretarako, hainbat herrialdetako eta profil sozial desberdineko sei gizonen, Genero Indarkeria Isolatzailearen biktima izan direnak, elkarrizketa sakonak aztertu dituzte metodologia kualitatiboari jarraituz.
Gizon horien jokabide ausartak agerian uzten du genero-indarkeriaren aurka borrokatzen diren maskulinitate motak daudela (MAB), jazarleen aldetik errepresaliak eta erasoak jasan arren, biktimen alde jarraitzen dutenak. Errepresalia horiek larriagotu egiten dira maite dituzten senideek ere jasaten dituztenean. Horrek itxaropena ematen digu, mito handi bat eraisten baitu: gizon guztiak berdinak eta jazarle posibleak direla. Hori ez da horrela, eta ez da inoiz izan, beti egon dira gizonak emakumeen ondoan borrokan.
Ildo horretan, ikerkuntzan parte hartu zuten gizon guztiek, hainbat mailatan, ondorio negatiboak jasan zituzten beren osasunean eta ongizatean. Beraz, azterlan horretan biltzen diren esperientziek argi erakusten dute errepresaliak jasateak zuzeneko ondorioak dituela, eta horrek eragin negatiboa duela osasun psikologikoan eta fisikoan, bai haientzat, bai maite dituzten pertsonentzat.
Hala ere, indarkeria mota horrek osasunean dituen ondorioei aurre egiteko eta horiek gainditzeko, biktimekin batera agertzen direnen babes- eta elkartasun-sareak laguntza gisa izan zituzten. Horien artean, bereziki nabarmentzen dute MAB gizonen arteko laguntasuna. Horregatik da garrantzitsua biktimei eta biktimei laguntzen dietenei babesa eskaintzea eta biolentziaren aurka egitea laguntza-sare indartsuak eraikiz.
Beraz, ikerkuntzak gero eta argiago azaltzen du MABen jarrera ausarta genero-indarkeria isolatzaileari eta genero-indarkeriari aurre egiteko gakoa dela. Gainera, laguntza-sareak osatzen dituztenean, osasunerako ondorio kaltegarriak prebenitzen dituzte, eta, aldi berean, erreferente sozialak dira beste gizon eta mutilentzat. Bide horretatik, MABak inspirazio-iturri izan daitezke haurrentzat txikitatik eskoletan, eta, horrela, genero-indarkeriaren eta genero-indarkeria isolatzailearen aurkako borrokan erasotzaile, biktima edo ikusle izatetik, lekuko aktiboak eta bizirauleak izatera igaro daitezke.
Egilea: Garazi Álvarez
