COVID-19aren pandemia mundu-mailan osasun publikoko larrialdi gisa aitortu zenetik gaiak toki handia hartu du gizartean. Ondorioz, haurrak nahitaez gaiari buruzko informazio asko jasotzen ari dira, eta baita helduen estres eta antsietatea ere. Instituzio, komunikabide eta sareetatik umeei zuzendutako informazioa zabaldu da, baina garrantzitsuena azpimarratu gabe: helduen inplikazioa ezinbestekoa dela informazio hori onuragarria izateko. Ildo horretan, The Lancet aldizkarian argitaratutako ikerketa batean haurtzaroaren ongizate psikologikoan laguntzen duten komunikazio-estrategien ebidentziak jasotzen dira:

  • Haurrek eta helduek egoera zailei eta familiako dinamikaren aldaketei buruz modu zintzoan hitz egin behar dute.

  • Haurrek gaixotasunaren transmisioaz zer pentsatzen duten entzutea ezinbestekoa da, baita transmisioari eta bere zergatiei buruzko azalpen zehatzak ematea ere, euren ulermena gutxietsi gabe.

  • Helduek, euren beldurrekin txikiak estutu gabe, haurren emozio eta sentimenduei buruzko elkarrizketak izan behar dituzte haiekin, eta sentitzen dutena adierazteko segurtasuna eman.

Ikerketak ondorioztatzen duenez, hilgarriak izan daitezkeen gaixotasunen inguruko komunikazio sentikor eta eraginkorrak onura handiak ditu haurtzarorako eta, epe luzera, inguru familiarraren ongizate psikologikorako.

Ondorioz, gaia saihesteak edo ulertzeko txikiegiak direla pentsatzeak babesgabetasun-, antsietate- eta estres-egoerak eragin ditzake. Ikerketaren arabera, haurrak txikitatik euren inguruan suertatzen diren aldaketez jabetzen dira, eta ondorioz, gertatzen denari buruz hitz egiteak egoera asimilatzeko eta horri aurre egiteko estrategia psikologikoak ematen dizkie.

Bestalde, kontuan izan behar dugu haurrak euren inguruko erreferentziazko helduen egoera emozionalekin sintonian daudela, eta eguneroko errutina eta egitura sozialean aldaketei konfinamenduaren efektu psikologikoa eta inguruko kezka gehitzen zaiela. Horregatik, ezinbestekoa da haurrei informazioa ematea, komunikazio sentikorra lehenestea eta euren kezka, zalantza eta beldurrei aurre egiteko orduan bakarrik ez uztea.

Orain arte gauzak oso ondo egin ez baditugu ere, oraindik aukera daukagu aipatutako guztia gauzatzeko deskonfinamendu-egoera berri honetan. 

Egilea: Laura Alvarez

LAURA